Futbol boýunça Ýewropa çempionaty gyzykly duşuşyklary bilen dowam edýär. Düýn “A” hem-de “B” toparlarynda duşuşyklar geçirildi. “A” toparynda Italiýa indiki tapgyra çykan ilkinji ýygyndy boldy.
“A” TOPARYNYŇ DUŞUŞYKLARY
“A” toparynda ilki bilen Türkiýäniň milli ýygyndysy bilen Uelsiň milli ýygyndylary duşuşdy. Duşuşyk 2:0 hasabynda Uelsiň peýdasyna tamamlandy. Türkiýäniň ýygyndysy 2 duşuşykda hem ýeňlip, indiki tapgyra çykmak mümkinçiligini örän kyn ýagdaýa saldy. Türkiýäniň ýygyndysy indiki duşuşykda Şweýsariýanyň ýygyndysyny ýeňen halatynda, iň gowy oýun görkezen 3-nji topar hökmünde indiki tapgyra çykmagy mümkin. Ýöne ol hem kynrak bolar. Sebäbi Tükriýäniň ýygyndysy 2 duşuşykda jemi 5 pökgi derwezesine goýberdi.
“A” toparynyň beýleki duşuşygynda Italiýanyň milli ýygyndysy ýene-de uly haspaly ýeňiş gazandy. Olar Şweýsariýanyň ýygyndysyny hem 3:0 hasabynda ýeňdi. 26-njy we 52-nji minutlarda Lokatelli hem-de 89-njy minutda Immobileniň gollary bilen ýeňip, indiki tapgyra çykan ilkinji ýygyndy boldy.
Şeýlelikde, Italiýanyň 6 utugy, Uelsiň 4 utugy, Şweýsariýanyň 1 utugy, Tükriýäniň bolsa 0 utugy bar.
ÝEŇILMEZEK ITALIÝA REKORDA BARÝAR
Şeýle hem Italiýanyň ýygyndysy Roberto Mançininiň ýolbaşçylygynda ýeňilmän gelýär. Olaryň ýeňilmän gelýän duşuşyklarynyň sany 29-a deň boldy. Ýene-de bir duşuşykda ýeňiş gazansa, rekord gaýtalanýar. Mundan ozal, Italiýanyň ýygyndysy 1935-1939-njy ýyllarda Wittirio Possonyň ýolbaşçylygynda 30 duşuşyk yzly-yzyna ýeňilmändi.
“B” TOPARY: RUSSIÝA HEM ÝEŇIŞ GAZANDY
Düýn “B” toparynda hem bir duşuşyk geçirildi. Onda Russiýanyň ýygyndysy Filnýandiýanyň ýygyndysyny 1:0 hasabynda ýeňdi. Duşuşygyň ýeke-täk goluny 45-nji minutda Alekseý Mirançuk geçirdi.
Birinji duşuşygynda Belgiýadan 3:0 hasabynda ýeňlen Russiýanyň ýygyndysy möhüm 3 utugyny gazandy.
17-nji iýunda ýyldyzlar näme diýýär? Gündelik Täleýnama