Tiz ereýän kofe dänelerini döretmäge bolan ilkinji synanyşyk 1890-njy ýylda täze zelandiýaly Dewid Strang tarapyndan amala aşyrylypdyr.
XX asyryň başlarynda, angliýaly Jorj Konstant Waşington şeýle içginiň köpçülikleýin önümçiligini ýola goýmaga synanyşýar. Emma hakyky «kofe ynkylabyny» geçen asyryň otuzynjy ýyllarynda «Nestle» kompaniýasynyň tehnology Maks Morgentaler edýär.
Munuň sebäbi Braziliýanyň kofe ekijileriniň kyn ykdysady ýagdaýydy. Braziliýada bol kofe hasyly önümleriň bahasynyň arzanlamagyna we ony satjak ýeriň galmandygyna sebäp bolupdyr. Kofe dänelerini-de uzak wagtlap saklamak kyn bolupdyr. Şol döwürde «Nestle» kompaniýasynyň işgäri Maks Morgentaler öz hasabyna kofe dänelerini satyn alýar.
Aradan iki ýyl geçip, Morgentaleriň işleri üstünlikli tamamlanýar. 1938-nji ýylyň 1-nji aprelinde «Nescafe» atly adaty bolmadyk içgi satuwa çykarylýar.