Ýurdumyzyň sebitlerinde täze metjitler we onuň ýanaşyk ýerlerinde sadaka berilýän binalar toplumy gurlar. Bu barada Türkmenistanyň Prezidenti Serdar Berdimuhamedowyň Ministrler Kabinetiniň Başlygynyň oba hojalyk toplumyna gözegçilik edýän orunbasarynyň, welaýatlaryň häkimleriniň gatnaşmagynda sanly ulgam arkaly geçirilen iş maslahatynda bellenilip geçildi.
Welaýatlaryň häkimleri öz sebitlerinde gurulmagy meýilleşdirilýän metjit hem-de onuň ýanynda sadaka bermek üçin niýetlenen jaýy gurmak baradaky teklip bilen döwlet Baştutanymyza ýüzlendi. Hormatly Prezidentimiz Serdar Berdimuhamedow metjit we onuň ýanynda sadaka berilýän jaýy gurmagyň sogap işleriň biridigini nygtamak bilen, bu teklipleri makullady hem-de halkyň islegine görä bu babatda degişli işleri geçirmegi tabşyrdy.
Ýurdumyzyň sebitlerinde gurulmagy meýilleşdirilýän metjitler:
- Ahal welaýatynyň merkezi Änew şäherinde metjit hem-de onuň ýanynda sadaka bermek üçin niýetlenen jaý gurlar.
- Balkan welaýatynyň Hazar şäherinde metjit hem-de onuň ýanynda sadaka bermäge niýetlenen binany gurlar.
- Daşoguz welaýatynyň Ruhubelent etrabynda metjit hem-de onuň ýanynda sadaka jaýy bina ediler.
- Lebap welaýatynyň Döwletli etrabynda metjit we onuň ýanynda sadaka berilýän bina gurlar.
- Mary welaýatynyň Oguz han etrabynyň Şatlyk şäherinde metjit hem-de onuň ýanynda sadaka bermäge niýetlenen bina gurlar.
Mälim bolşy ýaly, ýurdumyzyň sebitleriniň merkezi şäherlerinde metjitler gurlup ulanmaga berlipdi.