UEFA-nyň Çempionlar ligasynyň 2020-2021-nji möwsümdäki çempiony şu gün belli bolýar. Final duşuşygynda Angliýanyň “Mançester Siti” bilen “Çelsi” toparlary duşuşýar.
Ýewropanyň iň abraýly kubogy hasaplanýan Çempionlar Ligasynyň final duşuşygy Portugaliýanyň Porto şäherindäki “Dragao” stadionynda oýnalýar.
“MANÇESTER SITI” ÝEŇIŞ GAZANSA, ILKINJI KUBOGYNA EÝE BOLAR
Angliýanyň birnäçe gezek çempiony bolan “Mançester Siti” topary entek Çempionlar Ligasynda ýeňiş gazanyp görmedi. Pep Gwardiolanyň tälim berýän “Mançester Siti” topary ýeňiş gazanan halatynda ilkinji kubogyny eýelär.
Onuň finaldaky garşydaky “Çelsi” topary bolsa 2012-nji ýylda bu kubogy eýeläpdi. Eger şu gün ýeňiş gazansa, ondan 2-nji kubogyna eýe bolar.
“Mançester Siti” topary ozal Ýewropanyň kubok ýaryşlarynda “Çelsi” topary bilen 2 gezek duşuşdy.
DUŞUŞYGY “IP-TW”-DEN TOMAŞA EDIP BOLAR
Final duşuşygy Aşgabat wagty bilen 00:00 sagatda başlaýar. Türkmen futbol janköýerleri “IP-TW” platformasynda Russiýanyň “Match” hem-de “Futbol 1” teleýaýlymlaryndan bu gyzykly duşuşyga tomaşa edip bilerler.
Angliýanyň bu iki topary ýurduň çempionatynda hem-de beýleki duşuşyklarda 166 gezek özara duşuşdy. Olaryň 68-sinde “Çelsi” topary, 58-sinde “Mançester Siti” topary ýeňiş gazandy. 40 duşuşyk deňme-deň tamamlandy.
ÇEMPIONLAR LIGASYNDA 3-NJI IŇLIS FINALY
Ýewropanyň esasy kubogy bolan Çempionlar Ligasynda iňlis toparlary 3-nji gezek duşuşýar. 2008-nji ýylda “Mançester Ýunaýted – Çelsi”, 2019-njy ýylda “Liwerpul-Tottenhem” toparlary duşuşypdy.
Umuman, Çempionlar ligasynda 8-nji gezek şol bir ýurduň toparlary finalda duşuşýarlar. Futbol janköýerleri 2000-nji ýylda “Real Madrid-Walensia” (İspaniýa), 2003-nji ýylda “Milan-Ýuwentus” (İtaliýa), 2008-nji ýylda “Mançester Ýunaýted-Çelsi” (Angliýa), 2013-nji ýylda “Bawariýa-Borussiýa” (Germaniýa), 2014-nji ve 2016-njy ýyllarda “Real Madrid-Atletiko Madrid” (İspaniýa), 2019-njy ýylda “Liwerpul-Tottenhem” (Angliýa) duşuşyklaryna tomaşa edipdi.