Türkmen halkynyň Milli Lideri, Türkmenistanyň Halk Maslahatynyň Başlygy, Hormatly il ýaşulusy Gurbanguly Berdimuhamedow Arkadag şäherine iş saparyny amala aşyrdy. Bu barada “Watan” habarlar gepleşiginde habar berildi.
Türkmen halkynyň Milli Lideri saparynyň barşynda Arkadag şäheriniň Aragatnaşyk müdirligine baryp, Arkadag şäherinde aragatnaşyk ulgamynda alnyp barylýan işler bilen tanyşdy. Ähli ugurda bolşy ýaly, ulag we aragatnaşyk ulgamynda döwür bilen aýakdaş bolmak häzirki zamanyň möhüm talabydyr.
Bu ýerde Ministrler Kabinetiniň ýanyndaky Ulag we kommunikasiýalar agentliginiň Baş direktory M.Çakyýew Arkadag şäherinde synag görnüşinde gurnalan “4G+” ýokary tizlikli internet ulgamyny işe goýbermäge ak pata bermegini türkmen halkynyň Milli Liderinden haýyş etdi.
Türkmen halkynyň Milli Lideri “4G+” internet tehnologiýasynyň işine ak pata berdi.
“4G+” internet tehnologiýasy “4G” internet ulgamynyň täzelenen görnüşidir. Bu tehnologiýa internet ulgamynyň tizligini 2 esse artdyryp, 150 Mbit/s-den 300 Mbit/s ýetirmäge mümkinçilik berýär. Üç diapazonly “4G+” internet tehnologiýasy bolsa, internetiň tizligini 300 Mbit/s hem ýokary ýetirmek mümkinçiligine eýedir.
Umuman, “4G+” internet tehnologiýasy “LTE-A”, “LTE-Advanced” ýa-da “4.5G” ady bilen hem tanalyp, “4G” internet tehnologiýasynyň has çaltlandyrylan görnüşidir.