Türkiýäniň “Türkhowaýollary” milli awiakompaniýasy 4 ugur boýunça halkara uçar gatnawlaryny ýola goýýar. Bu barada awiakompaniýanyň baş müdiri Bilal Ekşi “Twitter” jemgyýetçilik tory arkaly habar berdi.
Täze uçar gatnawlarynyň ýola goýulmagy babatda kabul edilen çözgütler koronawirus pandemiýasynyň ýaramaz täsirleriniň azalmagy bilen baglanyşyklydyr.
Awiakompaniýanyň täze uçar gatnaw ugurlarynyň hataryna Özbegistanyň Buhara şäheri hem goşuldy.
Türkiýäniň milli awiakompaniýasy Sietl, Juba (Günorta Sudan) we Tiwat (Çernogoriýa) ýaly şäherlere hem gatnawlary açýar.
– Biziň täze gatnawlarymyz Sietl/ABŞ (27-nji maý), Juba/Günorta Sudan (1-nji iýun), Buhara/Özbegistan (7-nji iýun) we Tiwat/Çernogoriýa (11-nji iýun) – diýip, Bilal Ekşi belledi.
Täze ýola goýuljak gatnawlar bilen “Türkhowaýollary” ýolagçylaryny 128 ýurduň 338 nokadyna alyp barar.