BMG-niň bilim, ylym we medeniýet meseleleri boýunça ýöriteleşdirilen edarasy ÝUNESKO tarapyndan Hytaýyň gündogaryndaky Fuszýan welaýatynyň Sýuançžou port şäheri ÝUNESKO-nyň Bütindünýä mirasynyň sanawyna goşuldy. “Sinhua” agentliginiň habar bermegine görä, bu barada degişli çözgüt ÝUNESKO-nyň Bütindünýä miras boýunça komitetiniň onlaýn tertipde geçirilýän 44-nji mejlisinde kabul edildi.
Hytaýyň Fuszýan welaýatynyň Fuçžou şäherinde geçirilen komitetiň mejlisinde başga-da birnäçe ugurlar boýunça hödürnamalar seredilýär.
Sýuançžou şhäeri Beýik Ýüpek ýolunyň deňiz ugry iri söwda portlarynyň biridir. Ol Sun dinastiýasy (960-1279) hem-de Ýuan dinastiýasy (1271-1368) döwründe uly ähmiýete eýe boldy.
Hytaý tarapy bu möhüm port şäherini Bütindünýä mirasyň sanawyna goşmak üçin X we XIV asyrlarda şäheriň esasy port şäherdigini subut edýän onuň düzümindäki 22 desga boýunça hödürnama taýýarlady.
ÝUNESKO-nyň Bütindünýä mirasynyň sanawy 1978-nji ýyldan bäri taýýarlanýar. Onda adamzat üçin gymmatly sungat, taryhy we tebigy ýadygärlikler, deňiz desgalary bar. Hünärmenleriň pikiriçe, bir desganyň bu sanawa girizilmegi, adatça, syýahatçylyk akymyny we mahabatyny 200-300% ýokarlandyrmak arkaly amallaryndan gelýän girdejini artdyrýar. Sýuançžou şäheriniň goşulmagy bilen sanawdaky Hytaýyň desgalarynyň umumy sany 56-a ýetdi.