Horwatiýaly tälimçi Iwisa Oliç täzeden Russiýanyň SSKA toparyna gaýdyp gelýär. Ýöne ol bu gezek futbolçy däl-de, eýsem tälimçilik eder. Rus metbugatyň habaryna görä, Oliç SSKA-nyň täze tälimçisi bolar.
Toparyň ozalky belarusly tälimçisi Wiktor Gonçarenko bilen SSKA toparynyň arasyndaky şertnama taraplaryň özara ylalaşygy esasynda ýatyryldy.
SSKA topary Russiýanyň milli futbol çempionatynda 5-nji orunda barýar. 23 duşuşykda 40 utuk toplady.
Toparyň täze tälimçisi boljak Iwisa Oliç 2017-nji ýyldan bäri Horwatiýanyň milli ýygyndysynyň baş tälimçisiniň kömekçisi wezipesini amala aşyrýardy. Ol 2003-2006-njy ýyllar aralygynda SSKA toparynyň düzüminde çykyş etdi. Şol döwürde toparyň düzüminde 3 gezek Russiýanyň çempiony, 2 gezek Russiýanyň Kubogyny, 2 gezek Russiýanyň Superkubogyny we 2005-nji ýylda UEFA-nyň kubogyny gazandy.