Zahi Hawassyň ýolbaşçylygyndaky müsürli arheologlar ýurduň günortasyndaky Luksor şäheriniň golaýynda guma gömlen, 3 müň ýyllyk taryhy bolan şäheriň üstünden bardylar.
Şäher Müsüriň iň uly hökümdarlaryndan biri, miladydan öňki 1391-nji ýyldan 1353-nji ýyla çenli höküm süren 18-nji neberäniň dokuzynjy hökümdary Amenhotep III tarapyndan esaslandyrylan bolmaly.
Ýeri gelende aýtsak, bu şäher dünýäniň dürli künjeklerinden gelen arheologlar tarapyndan eýýäm uzak ýyllardan bäri gözlenilip ýörlen şäherdi. Ahyrynda ony tapmak ýerli arheologlara miýesser etdi.
Toparyň ýolbaşçysy Z.Hawassyň aýdyşy ýaly, şäheriň käbir diwarlarynyň uzynlygy üç metre ýetýär.
Gazuw-agtaryş işleri 2020-nji ýylyň sentýabr aýynda başlandy we olaryň ilkinji tapgyrlarynda arheologlar gadymy kerpiçleriň galyndylaryna gabat geldiler. Az salymdan bolsa diwarlary we otaglary doly diýen ýaly goralýan we içki bölegi gündelik zerur serişdeler bilen doldurylan şäher binalarynyň üstünden bardylar. Bu şäher geçmişde «Altyn şäher» diýlip atlandyrylypdyr.