Kilian Mbappe Ispaniýanyň “Real Madrid” toparyna geçmekden ýüz öwürdi. Ol özüniň meşhurlyk gazanan Fransiýanyň “PSŽ” toparynda galmak barada çözgüt kabul etdi.
Ýylyň iň uly transferiniň bolmagyna garaşylýardy. Ýöne “PSŽ” topary resmi taýdan Mbappeniň galýandygyny mälim etdi. Mbappe täze şertnamasy 2025-nji ýyla çenli döwri öz içine alýar.
“BBC” teleýaýlymynyň maglumatyna görä, Kilian möwsümde 40 million ýewro gazanar. Mundan başga-da, Mbappe şertnama gol çekişendigi üçin 150-den 200 million ýewro aralygynda pul alar.
“Eurosport” neşiriniň habaryna görä, Mbappeniň zähmet haky 100 million ýewro, gol çekişendigi üçin bolsa, 300 million ýewro almagyna garaşylýar.
Mbappeniň täze şertnamasy 2025-nji ýylyň 30-njy iýunyna çenli dowam eder. Kilian bu toparda 2018-nji ýyldan bäri çykyş edip gelýär. Ol “Monako” toparyndan 180 million ýewro satyn alnypdy.
Şu möwsümde Fransiýanyň çempionatynda “PSŽ” topary çempion boldy. Çempionatyň soňky duşuşygynda “Mets” topary bilen geçirilen duşuşykda 3 gol geçiren Mbappe 35 duşuşykda 28 gol geçirip, iň köp gol geçiren futbolçy boldy.
Şeýlelikde, Fransiýanyň futbol çempionaty tamamlandy. “PSŽ”, “Marsel” we “Monako” topary Çempionlar ligasynda çykyş eder. “Renn” topary Ýewropa ligasynda, “Nissa” bolsa Konferensiýa ligasynda Fransiýa wekilçilik eder.