Şu gün Hazar sammitine gatnaşmak üçin ýurdumyza gelen Gazagystanyň Prezidenti Kasym-Žomart Tokaýew Türkmenistanyň Milli Geňeşiniň Halk Maslahatynyň Başlygy Gurbanguly Berdimuhamedow bilen duşuşdy.
Gazagystanyň Prezidentiniň metbugat gullugynyň habar bermegine görä, Gazagystanyň Prezidenti Halk Maslahatynyň Başlygy Gurbanguly Berdimuhamedowy doglan güni bilen gutlap, onuň ýolbaşçylygynda Türkmenistanyň durmuş-ykdysady ugurlarda uly üstünlikleriň gazanylandygyny belledi.
Duşuşykda iki ýurduň arasyndaky gatnaşyklaryň strategik hyzmatdaşlyk derejesine çykandygy bellenildi. Taraplar söwda-ykdysady we medeni-ynsanperwer ugurlaryndaky gatnaşyklaryň yzygiderli pugtalanýandygyny bellediler.
Duşuşygyň barşynda Gazagystanyň Prezidenti Kasym-Žomart Tokaýew Türkmenistanyň Milli Geňeşiniň Halk Maslahatynyň Başlygy Gurbanguly Berdimuhamedowa Gazagystan Respublikasynyň ýokary döwlet sylagy – “Altyn Kyran” ordeni bilen sylaglady.