Ýurdumyzda Türkmen bedewiniň milli baýramy hem-de Türkmen alabaýynyň baýramy bilelikde bellenilýär. Türkmenistanyň Prezidentiniň Ahalteke atçylyk toplumynda geçirilen dabaralarda däbe öwrülen Türkmen bedewiniň milli baýramy mynasybetli geçirilýän ahalteke atlarynyň arasynda halkara gözellik bäsleşiginiň jemleýji tapgyry geçirildi. Bu barada “Watan” habarlar gepleşiginde bellenilip geçildi.
Türkmenistanyň Prezidentiniň Ahalteke atçylyk toplumynda geçirilen dabaralara Ministrler Kabinetiniň Başlygynyň orunbasary, Halkara ahalteke atçylyk assosiasiýasynyň ýolbaşçysy S.Berdimuhamedow, hökümet agzalary, harby we hukuk goraýjy edaralaryň ýolbaşçylary we köp sanly adamlar gatnaşdy.
Dabarada ahalteke atlarynyň arasynda halkara gözellik bäsleşiginiň jemleýji tapgyry geçirildi. Oňa deslapky tapgyrlarda saýlanyp alnan ahalteke atlarynyň 10-sy gatnaşdyryldy.
Emin agzalarynyň gelen netijesine görä, 2021-nji ýylda “Ýylyň iň owadan ahalteke bedewi” atly hormatly ada Aýgytly diýen ahalteke bedewi mynasyp boldy. Bu ajaýyp bedew Türkmenistanyň Prezidentiniň Ahalteke atçylyk toplumyna degişlidir. Onuň seýisi Çary Ballyyew.
Bäsleşigiň ýeňijisine Türkmenistanyň Prezidentiniň baş baýragy “Lexus” kysymly ýeňil awtoulagy, göçme kubok hem-de diplom gowşuryldy.