Mälim bolşy ýaly, 22-nji sentýabrda geçirilen Ministrler Kabinetiniň giňişleýin mejlisinde döwlet Baştutanymyz 1301 adamy Türkmenistanyň raýatlygyna kabul etmek hakynda degişli Permana gol çekdi. Şunuň bilen baglylykda, Türkmenistanyň Döwlet migrasiýa gullugynyň mejlisler zalynda Türkmenistanyň raýatlygyna kabul edilen adamlara pasportlary gowşurmak dabarasy boldy.
Oňa Türkmenistanyň Döwlet migrasiýa gullugynyň başlygy Amanmuhammet Sazakow, Türkmenistanyň daşary işler ministriniň orunbasary Wepa Hajyýew, halkara guramalaryň wekilleri, ýurdumyzyň degişli edaralarynyň wekilleri hem-de habar beriş serişdeleriniň wekilleri gatnaşdy.
“Atavatan Türkmenistan” halkara žurnalynyň döredijilik toparynyň çagyrylan dabarasynda hormatly Prezidentimiziň gol çeken resminamasyna laýyklykda, Türkmenistanyň raýatlygyna kabul edilen adamlara pasporty dabaraly ýagdaýda gowşuryldy.
Ministrler Kabinetiniň giňişleýin mejlisinde bellenilip geçilişi ýaly, ençeme ýyllaryň dowamynda Türkmenistanyň Prezidentiniň gol çeken Permanlaryna laýyklykda, ýurdumyzda ýaşaýan, şol bir wagtda hiç bir döwletiň raýaty bolmadyk 29697 adam Türkmenistanyň raýatlygyna kabul edildi.
Şeýle hem häzirki wagta çenli 4753 daşary ýurt raýatlaryna we raýatlygy bolmadyk adamlara Türkmenistanda ýaşamak üçin ygtyýarnama berildi.
Bu gezek bolsa, 1301 adamyň Türkmenistanyň raýatlygyna kabul edilmegi boýunça degişli işler geçirildi. Raýatlyk almak üçin hödürlenen adamlar 32 milletiň wekili bolup durýar.
Türkmenistana gelen daşary ýurt raýatlaryna ýurdumyzda ýaşamak üçin ygtyýarnama bermek baradaky şahsy ýüztutmalaryň hasaba alnan 265 adamyň ýurdumyzda ýaşamagy üçin ygtyýarnama bermek üçin degişli işler geçirildi. Olar dünýäniň 13 döwletiniň raýatlary we 25 milletiň wekilleri bolup durýar.