Şu gün Türkmenistan bilen Owganystanyň arasyndaky ikitaraplaýyn gatnaşyklaryň taryhynda ýatdan çykmajak wakalaryň biri boldy. Iri energetika, ulag-kommunikasiýa hem-de infrastruktura taslamalaryna badalga berildi we käbir möhüm taslamalar ulanmaga berildi.
Owganystanyň metbugaty bu wakalara öz sahypalarynda uly orun berdi. Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň hem-de Owganystanyň Ministrler Kabinetiniň Başlygynyň wezipesini ýerine ýetiriji Molla Mohammed Hasan Ahundyň gatnaşmagynda birnäçe möhüm taslamalara badalga berildi.
Türkmenistanyň Prezidenti Serdar Berdimuhamedowyň sanly ulgam arkaly gatnaşan dabarasynda «Türkmenistan- Owganystan-Pakistan-Hindistan» transmilli gaz geçirijisiniň taslamasynyň Arkadagyň Ak ýoly bilen «Serhetabat-Hyrat» gaz geçirijisiniň gurluşygyna badalga berilmegi TOPH taslamasynyň owgan bölegindäki gurluşygyna girişilmeginiň aýdyň subutnamasyna öwrüldi.
Owganystanyň Ministrler Kabinetiniň Başlygynyň wezipesini ýerine ýetiriji Molla Mohammed Hasan Ahund dabarada eden çykyşynda şu gün köp ýyllardan bäri garaşylan pursatyň gelip ýetendigini belläp, ähli kynçylyklary ýeňip geçip, uly taslamalary durmuşa geçirmäge girişýändiklerini aýtdy.
Ol TOPH gaz geçirijisi taslamasynyň iki ýurduň arasyndaky gatnaşyklary pugtalandyrjakdygyny belledi.
Türkmen halkynyň Milli Lideri öz çykyşynda şu günüň taryhy gün bolup durýandygyny belläp, iki ýurduň arasyndaky gatnaşyklarda täze sahypanyň açylandygyny aýtdy.
Türkmenistan bilen Owganystanyň arasyndaky gatnaaşyklar taryhy ähmiýete eýe bolup, iki ýurduň arasyndaky gatnaşyklar özara bähbitlilik, deňlik, dost-doganlyk we hoşniýetli goňşuçylyk ýörelgelerine esaslanýar. Iki ýurduň aarasyndaky ulag-kommunikasiýa, energetika we beýleki ugurlardaky hyzmatdaşlyk Owganystan üçin bähbitli bolup, doganlygyň özboluşly nusgasydyr. Owganystanyň halky bilen ykdysady, syýasy we diplomatik gatnaşyklary dowam etdirmek biziň syýasatymyzyň möhüm ugrudyr, diýip türkmen halkynyň Milli Lideri belledi.
Türkmen halkynyň Milli Lideri şu günki taslamalaryň Owganystanyň ykdysady we senagat taýdan ösüşine oňyn täsirini ýetirip, olaryň 12 müňe golaý owgan raýatyny iş bilen üpjün etmäge mümkinçilik döretjekdigini nygtady.
Türkmenistanyň Halk Maslahatynyň Başlygy bu taslamalaryň Owganystan üçin ykdysady taýdan hem bähbitli bolup, Owganystana her ýyl 1 milliard dollar goşant goşjakdygyny belläp geçdi.
Owganystanyň baş metbugat sekretary Zabihullah Mujahid Türkmenistan bilen Owganystanyň arasyndaky taslamalar barada aýdyp, TOPH gaz geçirijisi boýunça ilki bilen tebigy gazyň Hyrada eltiljekdigini belledi.
Ikinji tapgyrda Hyratdan Gilmend welaýatyna çenli gurluşyk işleri alnyp barlar we bu ýerde ulanyjy merkezi gurlar.
Üçünji tapgyrda bolsa, Pakistana we Hindistana gaz geçiriji barmazdan ozal, Kandagar welaýatyna eltiler.