Aşgabat şäherindäki Saparmyrat Türkmenbaşy adyndaky ýöriteleşdirilen umumybilim berýän mekdep-internatyna 2023-2024-nji okuw ýyly üçin Aşgabat şäherinden we welaýatlardan 2022-2023-nji okuw ýylynda orta mekdepleriň 6-njy synpyny tamamlaýan zehinli okuwçylar kabul edilýär. Bu barada “Mugallymlar gazetinde” degişli bildiriş ýerleşdirilipdir.
Dalaşgär okuwçylaryň 1 — 6-njy synplardaky bahalarynyň aglabasy 5-lik bolmaly. Mekdep-internatyna okuwa girmäge isleg bildirýän zehinli okuwçylaryň sanawy we aşakdaky resminamalar etrap (şäher) bilim bölüminiň üsti bilen degişli welaýat we Aşgabat şäher Baş bilim müdirliklerine 2023-nji ýylyň 1-nji apreline çenli iberilýär.
Baş bilim müdirlikleri bolsa okuwçylaryň sanawyny hem-de beýleki maglumatlary resmileşdirip, Aşgabat şäherindäki Saparmyrat Türkmenbaşy adyndaky ýöriteleşdirilen umumybilim berýän mekdep-internatyna iberýär:
— okaýan mekdebindäki şahsy jiltiniň mekdep müdiriniň möhüri bilen tassyklanan göçürmesi;
— mekdep tarapyndan berlen hödürnama;
— ýaşaýan ýerinden kepilnama;
— ata-enesiniň işleýän ýerinden kepilnama;
— saglyk ýagdaýy hakynda kesgitlenen nusgadaky kepilnama (086-H belgili kepilnama);
— 3×4 ölçegdäki 2 sany surat.
Mekdep-internatyna okuwa girmäge isleg bildiren zehinli okuwçylar bilen türkmen dilinden diktant, matematika hem-de taryh dersleriniň her birinden 3 soragdan ybarat bolan soragnama ýazmaça jogap bermek arkaly synaglar geçiriler.
Synaglaryň möhleti:
1. Aşgabat şäheri — aprel aýynyň 3-4-i (Aşgabat şäheri).
2. Ahal welaýaty — aprel aýynyň 5-6-sy (Aşgabat şäheri).
3. Lebap welaýaty — aprel aýynyň 7-8-i (Türkmenabat şäheri).
4. Mary welaýaty — aprel aýynyň 10-11-i (Mary şäheri).
5. Daşoguz welaýaty — aprel aýynyň 13-14-i (Daşoguz şäheri).
6. Balkan welaýaty — aprel aýynyň 17-18-i (Balkanabat şäheri).